Presidentes que cumpren cos comuneiros e comuneiras

Á vista da convocatorias que achego, Baroña xa celebrou a súa Asemblea Ordinaria, Miñortos e Xuño celebraran as súas o domingo día 22, mentres nós levamos 22 MESES, sen celebrar ningunha. Igual é que somos cidadáns de segunda e non temos pedigree para este IMPOSTOR, que nos toca sufrir.

Outro dato importante é que sen excepción ao contrario que aquí as convocatorias fanse tal e como ditamina a Lei, con 10 días de antelación.

Recupero esta entrevista a Ánxela Franco portavoz municipal do BNG en Porto do Son, no Xornal Dixital ​Muros e Noia, no que colaboro esporadicamente.

«A maioría absoluta deste goberno eliminou os plenos municipais polo que a actividade política municipal practicamente non existe: a veciñanza non ten posibilidade de participar nin pode coñecer a postura dos distintos grupos políticos e impiden o labor da oposición, en resumo, secuestraron a política municipal. O alcalde non ten experiencia ningunha e fai o que lle mandan».

O alcalde non eliminou os plenos municipais, porque se non xa estaría inhabilitado. Seguramente a Ánxela fóiselle a "olla" e en realidade estaba falando do seu colega en Nebra, que SI eliminou as Asembleas Xerais e as reunións da Xunta Reitora, por iso a veciñanza non temos a posibilidade de participar no futuro da NOSA COMUNIDADE nin poder coñecer os presuntos "amaños" que fai ás nosas costas... El si que ten secuestrada a comunidade.

Desde logo eu non me atrevo a facer o tipo de grave acusación que fixo na 3ª pregunta, xa que non son xuíz. Son un simple retranqueiro ao que lle gustan os refráns e por iso pregunto: Pensa o ladrón que todos son da súa condición?

Centrándome nas Ordes do Día destas comunidades:
1º.- Van presentalas contas do 2014. Nós nin coñecemos as do 2013.
2º.- Presentan plans de orzamento para o ano. Aquí non se sabe o que é iso.
3º.- Baroña e Xuño solicitan autorización para cortas. O 20 de xaneiro subín as fotos desta corta que non foi aprobada en asemblea, porén xa antes fixeron esta outra no linde con Noal, ao pé da pista que sobe a Sendia.

A Comunidade de Xuño: implicando aos rapaces co monte

Dado que son o futuro, que menos que implicalos dende pequenos nos coidados que precisa o monte. Se o lume e os pirómanos respectan a zona, en pouco anos terán a súa recompensa, en forma de castañas, e un aire moito máis limpo e saudable, ante o troco climático que xa se nos bota enriba.

Barbanza: Os sonenses respiran un aire máis limpo grazas aos nenos

Raquel Iglesias
Armados coa pa e o enciño, os nenos do colexio de Xuño subiron ao monte coa misión de colorealo de verde. A asociación de pais As Furnas interveu nunha xornada de divulgación que foi todo un éxito e na que participaron ao redor de oitenta persoas. Ademais de plantar carballos e castaños, os pequenos recibiron unha pequena explicación da repercusión que unha comunidade de montes ten no medio rural. Os sonenses respiran agora un aire máis limpo grazas a estes escolares que tan ben apresa teñen a lección de ciencias naturais.

Churrasco para todos

Despois de tanto exercicio e nada máis baixar do alto do Castelo, os participantes nesta iniciativa merendaron un churrasco preparado pola asociación de gandeiros de Xuño. Ademais, puideron levar a casa unha bolsa cunha planta que terán que coidar para que siga crecendo. Así demostrarán que o seu interese polo medio ambiente non foi só cousa dunha xornada.

Repoboación efectuada no noso monte polos rapaces de Afune, fai uns anos.

Parque eólico Singular da Pobra e de Porto do Son

O parque visto dende Guiandón-Xuño

Moi ben pola Xunta Reitora da Comunidade de Montes de Xuño, e no seu nome, o secretario, que non calan ante este agravio comparativo, como acostuman a facer na nosa Comunidade. Obviamente aquí ben que nin pintada esta pregunta: De quen é o monte, dos comuneiros e comuneiras de Xuño, do Concello ou da Xunta?

A CM de Xuño, propietaria dos terreos, non foi invitada...... loxicamente

A Comunidade de Montes de Xuño está orgullosa da posta en marcha dos Parques Singulares de Pobra e Porto do Son xa que os terreos onde están instalados os aeroxeneradores pertencen a nosa Comunidade (cousa que todos parecen esquecer).

Tamén é de xustiza que se sepa que a empresa que ten firmado o contrato ca Comunidade de Montes de Xuño desde 2003, está incumprido o mesmo sistematicamente.

Este contrato firmado polas partes basicamente di que a Comunidade cede un dereito de superficie á empresa adxudicataria da concesión dos parques singulares a cambio do pago dun canon anual baseado na potencia concedida (3 megavatios por parque eólico).

Desde a firma dos contratos a comunidade ten serios problemas para cobrar este canon. A empresa comenzou a pagar no 2009, logo de que a comunidade tivera que reclamarlle o pago de parte co canon 2007 e a totalidade do 2008.

Non hai un ano desde o 2009 que a empresa abone o canon dentro do prazo estipulado nos o que contratos, tendo a comunidade que reclamar este pago, o que nos ocasiona diversos gastos.

Ademais cando a Administración aumentou a potencia concedida (3 megavatios) a empresa ocultouno para non ter que aumentar o pago do canon, ocasionando novos gastos á comunidade para reclamar o que por contrato nos corresponde.

A última “xogada” da empresa PDR Aconteceunos este ano 2013, cando a empresa abona o canon a finais de abril (con 4 meses de atraso sobre a data estipulada no contrato, e logo de reclamarllo en numerosas ocasións). Por si isto non fora suficiente, a empresa non abona integramente o que por dereito a débeda á comunidade, si non que so ingresa parte do canon, debendo nestes momentos a Comunidade máis de 10.000 €. Unha cantidade que para a empresa non supón máis que “calderilla” (palabras textuais do propietario da empresa Antonio Vidal, ditas diante dos representantes da Comunidade e do Alcalde do Son), pero que para nos nos supón poder facer moitos traballos no noso monte, sobre todo cara a un verán que nos tememos moi duro cara a prevención de incendios.

Somos conscientes que para os Concellos de Porto do Son e a Pobra os ingresos que lle van reportar estes dous parques eólicos son cuantiosos, moito máis comparados co que a empresa ten que abonar por dereitos de superficie, e coa actual crise supoñen un balón de osíxeno para poder facer obras máis que necesarias.

Somos conscientes que para a Xunta de Galicia supón un tanto moi importante que sigan a funcionar as súas concesións administrativas.

Somos conscientes que para os veciños de Porto do Son e a Pobra son moi necesarios estes ingresos para que os seus representantes políticos podan xestionar os servizos que tanto necesitamos.

Pero tamén somos conscientes de que a Comunidade de Montes de Xuño ten todo o dereito do mundo a cobrar o que por lei nos pertence, e por iso estamos dispostos a recorrer a todos, Conselleiros, Alcaldes, veciños do Son, veciños da Pobra e comuneiros de Xuño para conseguir o noso propósito.

Un Saúdo de Manel Santos Secretario da Comunidade de Montes Veciñais en Man Común de Xuño.