Exemplo de transparencia, sen nada que ver co monte

Máis de «vinte e cinco meses» con unha Xunta Reitora «ilegal» que leva o mesmo tempo sen convocar e celebrar as asembleas regulamentarias que estipula a Lei e os Estatutos da Comunidade, aquí non só non se move ninguén se non que algúns aínda aplauden coas orellas a «chota» que sufrimos, e algunha por riba vacílanos.

Non hai nada máis que ver o comentario que pegaron aquí, porque se a exaltación do porco foi TAL ÉXITO SEN PRECEDENTES, como afirma por que non repetiron como prometeu? Publicamente fun dos que afirmei que iso foi un desastre, porén houbo moitos máis, e parece que non erramos porque nin esas contas ousan dar.

Tema aparte é o escurantismo que agochan non publicando as actas, xa non digo das Asembleas Xerais, se non da Xunta Reitora. Lembrades aquela transparencia coa que comezamos hai 10 anos, indo por primeira vez polas aldeas para que fósedes os propios veciños os que propuxerades aos vogais, e que prometeramos volver? Algúns atribuíronlle esa novidade ao «señor Santi?», cando en realidade saíu de min. Se non me creedes aí tendes a proba de porque XAMAIS se repetiu.

Este escurantismo ten moito que ver con poder seguir caciqueando a comunidade, porque se no seu día publicasen a acta da asemblea onde presuntamente se aprobou a colaboración ou o que fose con Asoporcel, poderíase impugnar por falta de quórum. Aquí entre todos metéronlle un GOL á Consellería do Medio Rural e Mar.

ACTA DA REUNIÓN EXTRAORDINARIA DA XD EN FUNCIÓNS, DA ACRV FLM DE AGUIÑO SOBRE O PROCESO ELECTORAL A MEMBROS DA XD PARA O PERÍODO 2015-2019.

Reunidos os once membros da XD da ACRV FLM, no local social, o xoves 18 de xuño de 2015,

ACORDAN:

1º Admitir a candidatura, que resultou ser a única presentada no período establecido, composta de once membros e encabezada por D. Unai González Suárez para a XD desta entidade na lexislatura 2015-2019.

2º Publicarse nos lugares habituais de información e aviso do pobo de Aguiño, na porta do local social da nosa entidade e nos perfís e páxinas de redes sociais que ten esta asociación, tanto desta resolución como da candidatura presentada, aos efectos de publicidade e exercicio no seu caso dos dereitos que puideran corresponder a calquera socio ou socia.

3º Establecer un período de dez días naturais, tal e como se establece na lexislación da materia e o regulamento electoral de entidades sen fin de lucro para que calquera socio/a interesado/a poida interpoñer recurso ou alegación á candidatura presentada, por escrito ante esta XD ou Presidencia en funcións (ao enderezo postal ou correo electrónico). Unha vez transcorrido o prazo, que contará a partir do día seguinte a esta publicación (do 21 ao 30 de xuño), entenderase que a candidatura queda aceptada e os seus integrantes pasarán a ser a nova Xunta Directiva desta asociación, cesando os cargos en funcións.

E para que conste, asina a presente en Aguiño, sendo as 21:45 h.

Vº e Prace. Unai González Suárez. Presidente en funcións.
Mª Pilar Millet Dios. Secretaria en funcións.

Para cando uns presupostos na nosa comunidade?

Hoxe poño como exemplo de transparencia e bo facer á Comunidade Montes Esteiro-Muros, para amosar que a maioría das reivindicacións que levo feito dende que tomei conciencia comunal a finais dos 80, non son perrenchas miñas. Fágoo porque é un dereito que teño recoñecido nos Estatutos da Comunidade e se agora uso só este medio, é porque prometinme a min mesmo que mentres a Democracia non volva á nosa comunidade, non penso intervir nas asembleas.

Como xa teño comentado, xamais entenderei as explicacións dadas nunha asemblea polo xa ex tesoureiro, polo cal se negaban a expoñelas as actas en publico. Segundo el, presuntamente foran varios comuneiros os que así o pediran, cousa rara, porque a min, o único responsable de expolas, ningún me dixo nada e dende a miña expulsión nunca as volveron a expor. O único certo é que cando un comuneiro nunha asemblea lles reclamou volver a expolas, non escoitei a ninguén pedilo contrario. Polo tanto, o único sitio onde esa presunta reclamación podería ter validez, seria nunha asemblea xeral e despois de que a maioría dos asistentes así o aprobase. De aí que siga insistindo, o que se "debata e aprobe nas tabernas" non ten validez legal, por moito que, como estamos vendo, a xunta reitora aplique eses acordos. En realidade iso só ten un nome...

Dende que nos devolveron os montes o 22 de outubro de 1979, ningunha xunta reitora, aquí tamén entoo o "mea culpa", foi quen de elaborar un presuposto anual, como adoitan facela maioría das comunidades, se non todas. Aquí todo se basea en gastar en vista dos números que teñamos no banco. Coma comunidade, o día que non teñamos ren, desapareceremos, porque mentres a bolsa estea repleta calquera é administrador e se non, aí temos o exemplo dos políticos que gobernaron e gobernan España e Galiza.

Unha comunidade que traballa en base a esa formulación de futuro é a de Esteiro, á que literalmente podemos mirar de fronte, salvando a ría. Estas son as súas contas para este ano. Obsérvese tamén o reconto de votos, algo que na nosa é difícil de ollar porque fai tempo que non se vota nada, aínda que as actas reflictan que todo se aproba por maioría.

O domingo día 1 de xullo celebrouse a asemblea extraordinaria da comunidade de montes. aprobándose os presupostos para o ano 2012, coa abstención de 1 comuneiro e os votos en contra de 8.

Nos presupostos están recollidas as seguintes partidas:

Axudas as asociación esteiráns.- 7500€
Esteirana de Fútbol.- 2250€
Esteirana Remo.- 2250€
A.N.P.A.- 200€
Carrilanas.- 300€ + 1€ por alpaca que se poña no monte
Nova Comisión de Festas de Esteiro.- 500€

O resto da partida que pendente para as axudas que se poidan solicitar para eventos a celebrar na parroquia.

Oficina.- 3000€
Coche.- 5000€
Monte.- 30000€
Animais.- 4500€

Ademais destas partidas engádese na asemblea unha nova partida para o pago do ive (que por error desta nova directiva non fora tido en conta).

Estímanse uns ingresos este ano de arredor de 46000€, polos eólicos e a compensación económica para actividades de divulgación medioambiental.

O 25 de febreiro o saldo desta asociación era de 49.447,07€

Se desexan coñecelo traballo que desenrola esta comunidade veciña, poden solicitala súa amizade no seu Facebook.

Adiántolles aquí unha pequena mostra da súa cabana gandeira.