Cantos sodes capaces de vincular ao señor Otero (Q.E.P.D.), coa creación da Comunidade de Montes?

Seguramente ben poucos e o presidente na clandestinidade dende maio, o primerio. Pois ben, ademais de ser o primeiro presidente da comunidade, tamén o foi da asociación de veciños. Logo de arrebatarlle a documentación e o cargo (coñezo a historia porque contouma persoalmente), vería a etapa máis negra da comunidade até os nosos días, que seguramente daría para escribir varios libros.

A ninguén lle gusta furgar no pasado, sobre todo a este presidente, salvo, por política, se son cousas do Concello a pesares de que xamais conseguiu a condición de edil. Porén para que en Nebra non se repita a historia as veces é conveniente descubrir de onde vimos e a onde vamos e saber quen foi e quen é na Comunidade.

Faro de Vigo: Mourente non esquece a Solla Tomé

A parroquia homenaxea a figura do líder veciñal e promotor cultural

Existimos tamén porque nos lembran, de modo que Manuel Solla Tomé segue vivo en Mourente, onde impulsou tantas actividades e proxectos, caso da Sociedade Cultural e Deportiva, o grupo Teatro Xenio, a Comunidade de Montes ou a agrupación coral Voces Amigas de Mourente.

Todos estes colectivos uníronse onte nunha homenaxe ao líder veciñal no primeiro aniversario do seu falecemento.

Os actos arrincaron en Monte da Rodela, onde a Comunidade de Montes de Mourente descubriu unha placa conmemorativa. Esta busca perpetuar a memoria dunha persoa que contribuíu a marcar un modelo de xestión dos recursos forestais e cuxos veciños lembran polo seu entusiasmo, capacidade de traballo e empatía, un carácter amigable que fixo que o seu falecemento causase un profundo pesar entre as numerosas persoas que o apreciaban.

Tras o descubrimento da placa os participantes na xornada trasladáronse á igrexa parroquia de Mourente, onde se oficiou unha misa en memoria de Manuel Solla Tomé. A familia Solla Barragáns estivo acompañada polos veciños que quixeron mostrar o seu aprecio a unha persoa de "exemplo de integridade persoal", como destacan os organizadores dos actos.

Estes inciden en que a actividade do líder veciñal e promotor cultural falecido "estivo marcada pola independencia, a eficacia na xestión e o progreso da parroquia como obxectivo principal".

A xornada tamén incluíu un acto de recordo na sede da Sociedade Cultural e Deportiva no que participaron as catro citadas agrupacións que xestou e/ou encabezou Manuel Solla Tomé. Foi outra oportunidade para rememorar os importantes servizos que prestou á parroquia que hoxe negase a esquecelo.

Comuneiros agradecidos e directivos aproveitados

Mentres noutras Comunidades de Montes e parroquias agradecen a labor, aínda que sexa a título póstumo, dalgún dos seus exdirixentes, aquí aproveitámonos do legado que nos deixaron algúns e non falo a título persoal.

Cando unha persoa, dá o paso para formar parte da representación comunal, é dicir, ser elixido reitor para representarnos, deixa de ser un comuneiro común para ter que comportarse sempre dun xeito correcto ante as persoas que representa, o que en moitos casos, supón unha renuncia persoal a certos espazos de liberdade, que ten que levar a cabo, para mantelo nos respecto, porque aínda que teñan dereito a certas licenzas, ben é certo, que non poden dar a imaxe de ser unha persoa de vida desordenada ou que non saben responder á imaxe de autoridade pública que lles demos.

E aínda que unha persoa teña nas súas mans o poder da administración da Comunidade, debe de ter sempre un comportamento, se cadra, máis humilde do esixido, para poder representarnos do xeito máis achegado posible e así poder recibir mellor as problemáticas que nos preocupan.

Aclarado isto, teño todo o dereito do mundo a denunciar unha vez máis que en Nebra, temos directivos aproveitados que no canto de ser agradecidos, sen merecelo, apuntábanse a «enchelo bandullo e a regalo ben» á conta da comunidade. Sempre pensei que, «a muller do Cesar non só ten que ser honrada, se non que tamén debe de asemellalo.».

De aí que a menor oportunidade e cando ollei por onde ían os derroteiros fuxise da Xunta, aínda que iso me supuxese non cobrar o que por Lei me corresponde e algún pense que me expulsou..., esquecéndose que iso só acontece nas Ditaduras.

Faro de Vigo: En recordo de Manuel Solla Tomé

As asociacións e Mourente homenaxean ao líder veciñal no primeiro aniversario da súa morte

O monte da Rodela será escenario mañá do arranque da homenaxe a Manuel Solla Tomé, o líder veciñal e activista cultural falecido o pasado ano e que estivo detrás de boa parte das iniciativas desenvolvidas na parroquia, como a Sociedade Cultural e Deportiva e a Comunidade de Montes, dúas das entidades que organizan os actos de recordo en colaboración co grupo de teatro Xenio e a coral "Voces Amigas", da que era presidente cando faleceu.

Ás 17 horas a Comunidade de Montes descubrirá no monte da Rodela unha placa na súa memoria. Hora e media despois a igrexa parroquial será escenario do oficio relixioso do primeiro aniversario e ás 20 horas a Sociedade Cultural e Deportiva será escenario do acto de recordo no que participará este colectivo, o grupo de teatro Xenio, os comuneiros e a coral.

Todos eles lembrarán o labor de Manuel Solla en diferentes colectivos sociais, culturais e de xestión dos montes, entidades nas que, afirman, marcou un modelo de xestión. "Exemplo de integridade persoal, a súa actividade estivo marcada pola independencia, a eficacia na xestión e o progreso da parroquia como obxectivo principal", sinalan os organizadores.

Estes subliñan que Manuel Solla Tomé "en Mourente creou escola e hoxe é respectado polos seus méritos e polos grandes servizos que lle prestou; a noticia da súa morte fai agora un ano causou gran conmoción e fondo pesar nos moitos amigos que deixou e que lembran a súa capacidade de traballo, o seu entusiasmo e carácter amigable".