Magoa que só defendan o que lles intereza

Como entendo a estes veciños e veciñas que sen comelas nin bebelas, se ven implicados nesta presunta trama. Efectivamente, se a Xunta ou os forestais actuasen sempre co mesmo celo, estas cousas non pasaban. O mesmo pasa cos partidos políticos, que se se comete unha irregularidade baixo o seu goberno, si te he visto no me acuerdo.

Se o Distrito V en Vimianzo se aplicase como fixo o de aquí, cando fai uns anos aprobamos nunha asemblea depositar as pedras extraídas dun desmonte de Portosín, seguramente non pasaría isto. Daquela, o Distrito IV tendo previo coñecemento desa aprobación, ameazou con denunciarnos porque un directivo antes de que lle entregásemos toda a documentación e certificación desa aprobación, comunicoulle á empresa que xa podía depositalas pedras. Estábao facéndoo cando o garda forestal os detivo e me chamou ao móbil  teléfono para advertirme desa grave irregularidade coma se fose eu o responsable, cando tamén tiña o do presidente, aínda que se o fixo, igual non llo colleu como acostumaba a facelo sempre.

Celo que non tiveron cando sen que aprobación previa, documentación de ningún tipo e moito menos certificacións do secretario, ordenaron a construción da pista nos Balados, tronzando polo medio propiedades privadas. Como ben digo, daquela ao BNG non só lle interesou investigar que foi o que pasou, se non que agocharon todo.

Por suposto que non estou a defender a actuación da Xunta e do que está pasando en Vimianzo, só me limito a sinalar a dobre vara de medir dos políticos. Tampouco é que o faga precisamente agora, se non que o levo facendo bastante tempo e sempre que ollo similitudes neste tipo de cacicadas.

La Voz de Galicia: Os afectados da trama forestal culpan á Xunta

Os afectados pola suposta estafa das axudas forestais, 35 dos cales participaron o mércores pola noite nunha asemblea celebrada pola Fruga e o BNG en Vimianzo, apenas se referiron ao presunto xefe, Manuel Maceiras Hermida, e culparon aos distintos niveis da Administración autonómica por non levar a cabo un control rigoroso na concesión das subvencións.

Os denunciantes, que mantiveron un encontro con Manuel Dacal e Gabriel López (Fruga) e coa deputada do BNG Tereixa Paz, temen que agora lles obriguen a eles a efectuar as limpezas que, segundo din, cobrou a empresa sen facelas e que Facenda lles reclame a tributación correspondente, tendo en conta que nestes anos nunca recibiron comunicación algunha para facelo. «Eu non entendo como cando cobras, aínda non, 200 euros do millo tes que pagar e isto que eran miles, a nós non nos chegou nin a primeira carta», sinalou un veciña de Berdeogas. Outra muller de Dumbría, á que tamén lle atribuíron leiras que non son súas, queixouse de que «os forestais non viñesen pola porta en cinco anos e aparezan agora pedindo firmas para certificar que se fixeron as limpezas, cando realmente están sen facer». E unha terceira veciña da mesma zona, respecto ao proceso xudicial aberto en Corcubión, manifestou o seu desexo de que «dure menos que o do Prestige».

A Fruga teme que este caso obrigue a devolver axudas da Unión Europea
("...Paz asegurou que independentemente do Goberno que salga das eleccións tratarán de que a Xunta investigue a fondo este caso..."). do noso seguro que non lle interesará investigar a fondo.

Ninguén tira pedras ao seu tellado

Menos mal que de vez en cando sae á luz pública algunha cacicada deste tipo, non sei se é por agochar outras maiores, ou por algo que se nos escapa das mans. Porque a dicir verdade neste tema das subvencións, hai para dar e tomar.

A verdade que xa hai que discorrer para pedir presuntamente subvencións sobre as propiedades duns paisanos, como tamén pedirlle a Medio Rural que abrise unha pista polo medio de propiedades. Ao fin, e ao cabo, se cacicada é a primeira, cacicada foi a segunda. A diferenza que hai nestes dous casos concretos, é que unha foi cometida presuntamente por xente da rúa, e a segunda, por todo un goberno.

Claro que despois cando lees un pouco comezas a entender algo: Suárez Canal engade, entre outras diferenzas, que cando el foi conselleiro non certificou nada, non plasmou a súa sinatura, senón que o fixo un funcionario coa intención de, toda vez que estaba practicamente rematada, axilizar o pago á empresa para favorecer a súa liquidez nesta época de crise. Fonte: http://bngdedodro.blogaliza.org/archives/175/

Nada teñen que ver esa verbas coa pista que menciono, pero alguén tivo que certificala e apesares de que se lle solicitou toda documentación por activa e pasiva, a resposta foi sempre o silencio administrativo. Sería tamén cousa dun funcionario?

Choca que daquela para o BNG, e excompañeiros, iso non fose «unha tomadura de pelo», como afirman neste caso que partillo. Para min aquel goberno tamén foi «irresponsable» por non depurar responsabilidades. Pero claro, ninguén tira pedras ao seu tellado.

La Voz de Galicia: A trama das subvencións forestais supera xa os 100 casos denunciados

A trama para obter subvencións de reforestación de xeito fraudulento, supostamente dirixida polo empresario vimiancés Manuel Maceiras Hermida, non para de crecer. Cos expedientes acumulados durante o verán o número de casos denunciados que obran en poder da Federación Rural Galega, o sindicato que aglutina á maior parte dos afectados, supera xa o centenar, aínda que como indica o coordinador da Fruga, Gabriel López, «poderían ser moitos máis porque hai xente que está actuando a nivel particular».

As parcelas plantadas con fondos europeos nas que presuntamente a organización falseaba desde as declaracións xuradas de propiedade ata as direccións para recibir o correo da Administración localizábanse fundamentalmente en Dumbría, aínda que os últimos casos detectados apuntan a que o problema pode ser similar en Vimianzo.

Casos esperpénticos

Neses expedientes tampouco paran de sucederse as situacións esperpénticas, como o caso dunha suposta solicitante que asinaba documentos e pagaba facturas seis meses despois de ter falecido ou a atribución totalmente aleatoria da titularidade das parcelas. Proba diso é a plantación de leiras que no rexistro catastral aparecen consignadas a coñecidas empresas enerxéticas da zona, cuxa actividade non garda relación coa explotación forestal.

A Xunta, a través da comparecencia en comisión parlamentaria do secretario xeral técnico da Consellería do Medio Rural e do Mar, Francisco José Vidal-Pardo Pardo, asegura que, por parte do Goberno autónomo, «cumpriuse escrupulosamente co manual» e, ao tratarse dun asunto xudicializado, o que debe facer a Xunta é «calar a boca». Con todo, a portavoz do BNG na comisión, Tereixa Paz, considera esta resposta «unha tomadura de pelo» e tacha a Vidal-Pardo de «irresponsable» por non investigar o destino dunha inxente cantidade de fondos públicos.